Sonda, ils 8 d’october 2022 ei stau il 15avel Gi da Platta Pussenta. Ensemen culla cuminonza d’interess dils possessurs da habitaziuns secundaras ha la fundaziun organisau ina excursiun da Falera tochen a Sagogn Plaun Pigniel. Las participontas ed ils participonts han retschiert informaziuns dils projects da pli baul e dils actuals ellas vischnauncas Falera, Laax, Sagogn e Schluein. Avon la partenza han ellas ed els denton astgau seproviantar cun cornets e caffè che la vischnaunca da Falera ha offeriu el hotel Siala. Lu ha la tura leva viers Sagogn entschiet. Ina emprema fermada ha ei dau gia suenter cuort temps sper ina muschna da valur ecologica. Igl ei in dacasa multifar e spazi da viver da diversas specias d’animals e plontas. Vinavon havein nus presentau als hosps il project da ruvers e mussau il project Lag digl Oberst sco era il curtgin da nughers a Plaun Larisch. La gruppa ha denton era empriu d’enconuscher il liug da Platta Platta Pussenta, la historia e muntada ch’ei davos quei num. Sco il «herox» dil gi ei denton il ruver semussaus! Ins gi ch’in ruver detti albiert a 500 sutlocaturs, igl ei en tuttacass in spazi da viver elementar ed indispensabel per numerus animals pigns e gronds! Il ruver ha ina fetg gronda impurtonza ecologica.
Alla fin dall’excursiun ha la gruppa astgau guder sil bi plaz da grilar a Plaun Pigniel sur Sagogn in fin apero che Sagogn Turissem ha sponsurau.
Engraziel fetg a tuttas participontas e participonts per lur sustegn. Igl ei stau in bi e gartegiau Gi da PP 2022. Nus selegrein gia sil proxim dil 2023.
