Sonda, ils 12 d’uost 2023 ei stau per la 16avla gada il Gi da Platta Pussenta. Igl ei in’occurrenza d’acziun e d’informaziun. Uonn ein las specias jastras e problematicas, numnada neofitas invasivas, stadas el center. Tgi enconuscha buca la biala flura aulta e melna, la torta d’aura canadesa? Ni la rigera annuala, ina plonta cun fluras pintgas che semeglian la margreta? Ni era la siringia, ina caglia dils orts che derasa in bien fried? Igl ei treis da numerusas neofitas invasivas che sederasan e secreschan dapertut ella cuntrada. Malgrad lur bialas colurs e la qualitad da porscher nutriment alla fauna indigena eis ei plontas ch’ins sto cumbatter. Neofitas invasivas scatschan buca mo en biars cass la flora indigena mobein san era esser prigulusas per la sanadad dil carstgaun. Aschia eis ei stau gl’intent dil gi d’acziun d’informar dallas invasivas e da mussar ella pratica co ins sa cumbatter ellas. Lisa Zimmermann (insch. ambientala. FH, management da neofitas) ha presentau alla gruppa da participontas e participonts las pli enconuschentas che creschan en quei territori, aschia p. ex. la balsamina cun glondas, la torta d’aur canadesa, la rigera e la siringia. Ella ha explicau co quellas plontas ein vegnidas en Svizra, co igl ei gartegiau ad ellas da sederasar ed entschiet a scatschar autras, ni schizun a periclitar la sanadad dil carstgaun. Ils sems da neofitas ein pilpli vegni importai tras il traffic e commerci internaziunal. Certas han ins era importau sco pavel pils aviuls. Inagada en Svizra, ein ellas «fugidas» e vegnidas selvadias sin plazzals da baghegiar, suenter lingias da trens ni en deponias da verdem. Insects ch’ein ellas tiaras d’origin inimitgs da quellas plontas, mauncan ella tiara nova, aschia ch’ei dat negin cunfins per ellas. Ils participonts han ers smarvegliau d’ina informaziun che pertucca la rigera annuala. La ragisch da quella cuntegn ina certa materia organica secundara che limitescha ni impedescha schizun la carschientscha da plontas ella vischinonza. En Svizra dat ei plinavon treis specias da neofitas invasivas ch’ein nuscheivlas ni riscantas per la sanadad dil carstgaun. Aschia l’ambrosia, la senecia sidafricana (Schmalblättriges Greiskraut) e la darvenna da Mantegazzi (Riesen-Bärenklau).
Suenter l’introducziun impressiunonta ein participontas e participonts semess en gruppas, equipai cun sacs specials da dismetter, alla tscherca dallas neofitas invasivas. Ed els han anflau biaras: siringia, torta d’aur, balsamina cun glonda ed era la rigera annuala. Nus tuts havein empriu quei gi d’acziun bia dallas neofitas. Per proteger la flora e fauna sco era nossa sanadad eis ei impurtont da cumbatter quellas specias nuscheivlas importadas. In grond engraziament a tuttas participontas e tuts participonts per lur sustegn. Il Gi da PP 2023 ei gartegiaus e staus in pulit success.
Per cass che Vus s’interesseis e giavischeis ulteriuras informaziun da neofitas, il cumbat ed ils cussegls da dismetter ellas, dat ei cheu diversas documentaziuns tier la tematica.: