La Platta Pussenta –

in spazi unic dalla natira

 

Nua ei la Platta Pussenta situada exact?

 

El punct geografic cul num local «Platta Pussenta» ei in plattiu marcant. Igl ei il punct da cunfin cumineivel dallas vischnauncas Falera, Laax, Sagogn e Schluein. Las coordinatas ein 737'749 / 183'972. La muntada da quella platta cumprova il fatg che Falera ei colligiada culla Platta Pussents sulettamein tras in péz git che tonscha giuaden da siu cunfin el sid. Grazia a sia exposiziun viers sid, la speciala multifariadad geologica, la reha historia sco era ina cultivaziun agricola extensiva includa il territori ina pluna scazis natirals e culturals.

​

El nord dil perimeter da Platta Pussenta ei il territori da skis da Laax e Falera. El sid s’extenda la gronda planira fritgeivla sco era dapi 2008 la plazza da golf Sagogn-Schluein. Il perimeter sez va bunamein en emblidonza ed igl ei da temer ch’el vegni negligius. Adina pli ferm va ei en direcziun dalla cultivaziun intensiva che ignorescha surfatschas pintgas e spundivas. Territori ch’ins ha runcau cun bia stentas e fadigias mereta da vegnir mantenius.

​

​

Situaziun, detagls

​

18 pertschien dil perimeter PP ei terren nuncultivau. Ina surfatscha considerabla ei custeivla paliu e garda. Il perimeter general da Platta Pussenta s’extenda naven dalla Val Mulin egl ost tochen el vest tier l’anteriura ruina Löwenstein sil cunfin cun Glion. La Fundaziun PP s’engascha era pils objects culturals che van plaunsiu en muschna, sco era vias historicas negligidas.

 

Vischnauncas: Falera, Laax, Sagogn, Schluein.

​

​

Spazis da viver/biotops

​

Platta Pussenta ei buca ina cuntrada dalla natira, mobein ina cuntrada culturala datier alla natira, in spazi ch’ils carstgauns han influenzau e formau. El perimeter ein pastiras, muschnas, rovens e terrassas, pigns uvrius, ogna, èrs, mirs schetgs, vias historicas, vegls mulins sco era ina flora e fauna fetg varionta e per part fetg rara.