Ils 23 d’october 2021 ei stau il 14avel Gi da Platta Pussenta. Quel ei staus uonn a Laax, el center ei stada la Ruina Lagenberg amiez igl Uaul Casti.
Mintg’onn, alternond ellas vischnauncas Falera, Laax, Sagogn e Schluein, vul la fundaziun Platta Pussenta cun quei gi d’acziun mussar alla populaziun projects che han connex culla tgira dalla cuntrada e cultura.
Uonn ei la sanaziun dalla Ruina Lagenberg stada el center. Ei setracta d’in monument historic situaus sigl ault denter Cons e Murschetg. Lagenberg ei in edifeci ch’ins ha construiu il 12avel tschentaner. Oz existan mo pli restonzas dalla tuor principala dil casti. Ils davos onns eran ils mirs surcarschi da caglias e quellas havessen priu pli e pli possess dallas ruinas e schau ir en emblidonza la perdetga historica da Laax. Il casti era il center dil contadi da Laax. Bein e segneradi ein vegni entuorn 1330 en possess dils signurs da Werdenberg-Sargans. Ella dispetta per possess ed ierta denter Donat da Vaz ed ils da Werdenberg-Sargans ha Donat da Vaz conquistau e destruiu Lagenberg. Suenter han ins mai pli reconstruiu il casti. La fundaziun Pro Laax ha instradau in project da sanaziun cugl intent da tener en memoria in impurtont capedel dalla historia locala e cunquei da mantener quella perdetga dil temps vargau.
A caschun dil Gi da Platta Pussenta han participontas e participonts festivau la restauraziun migeivla dallas restonzas da Lagenberg. Corsin Caduff, il responsabel dil project e commember dil cussegl da fundaziun da Platta Pussenta, ha raquintau dil vegl contadi e dils Libers da Laax. Christoph Walser, collaboratur dil Survetsch archeologic dil Grischun, ha plidau dallas lavurs da sanaziun. Sco engraziament per lur preschientscha ed interess han participontas e participonts astgau guder spisa e bubronda sil Plaun Casti sut la ruina.
​
In engraziament cordial a tuttas persunas ch’ein segidadas e che han mussau interess. Oravontut in engraziament resentiu alla Pro Laax sco era alla Tgira da monuments dil cantun Grischun pil sustegn e per l’incumbensa.
