top of page

Activitads entuorn la Platta Pussenta

Ruina Lagenberg, Laax (2020-2021)

Pert. la ruina Lagenberg:

Ei setracta d’ina scavaziun archeologica enconuschenta el senn digl art. 33 dalla lescha cantunala pil schurmetg da natira e patria. La ruina Lagenberg ei situada sin in crest giudem la collina dil Uaul Casti, sin 1127 m.s.m., denter Laax Cons e Laax Murschetg. 

La moda dalla construcziun dils mirs dalla ruina laian presuponer ch’il casti ei vegnius baghegiaus ella secunda mesadad dil 13avel tschentaner. La ruina ei menziunada l’emprema gada gl’onn 1303 ed ei vegnida destruida 1323 da Donat da Vaz en connex cun in cumbat da pussonza. Suenter eis ella buca pli vegnida reconstruida. El cudisch dils castials eis ei era menziunau ch’il casti Lagenberg era in tip architectonic extraordinari enteifer ils castials dalla regiun. 

Las paucas restonzas dils mirs laian presupponer in grond e vast stabiliment silla collina.

Digl entir cumplex ein mo pli restonzas dalla tuor veseivlas, sco era parts dil mir encunter nord, vest e sid. Il mir encunter ost ei scurdaus resp. erodius. Dus ulteriurs baghetgs che suandavan el sid suenter la tuor, ein mo pli da distinguer sco formaziun undegionta ella cuntrada. Igl ei da presupponer ch’igl existeva el proxim contuorn ulteriurs stabiliments che s’udevan tiel casti da Lagenberg.

 

Descripziun dil project Lagenberg::

Cun liberar las restonzas dalla miraglia d’uaul e cagliom vulan ins mantener la ruina Lagenberg, ella duei esser presenta sco bein cultural dalla vischnaunca da Laax.

La populaziun duei haver la pusseivladad da la ruina Lagenberg sco part dalla historia da Laax.

Mesiras da revaletaziun Plaun Pigniel-Teit Sura, Sagogn
(2020-2024)

Territori:

Plaun Pigniel-Teit Sura ei ina pastira da muntada regiunala (TWW) sco era ina paliu da muntada locala, ella ei situada el nord dil Vitg dadens da Sagogn.  

 

Project:

Finamira eis ei da midar la surfatscha nuncultivada e da revaletar ella en ina surfatscha da muntada naziunala, da liberar la paliu da cagliom e da promover ella.

Per tener liber il spazi e promover la vegetaziun da pastira e da paliu vegn ina part digl uaul da tieua e pégns aviarts. Gl’avanzar digl uaul e da cagliom vegn retenius e la faletga cumbattida. Per ina emprema runcada segida la scola da Sagogn cun acziuns effectivas dils scolars. Plinavon vegnan las nuorsas dil raz «Heidschnicken» a pascular il territori.

Mesiras da revaletaziun Quadras, Schluein (2020-2023)
Quadras.png

Territori:

Quadras schai el nord dalla plazza da golf a Schluein, denter la via Sagogn ed il stradun digl Alpsu. La pastira definida el cataster cantunal sco "Trockenwiese-Weide TWWW" da muntada naziunala s'auda ei ina zona da protecziun, igl ei in'anteriura pastira da stad dalla vischnaunca. dapi entgins onns vegn l'entira sufatscha buca pli pasculada

 

Project:

Il territori vegn revletaus ed engrondius cun reducir la faletga sco era il cagliom che s'avonza. Igl ei era previu da nivelar la part sut cugl ur digl uaul.  

 

En in emprem pass vulan ins contonscher quella finamira cullas suandontas mesira:

  • Cuntinuar culla pasculaziun extensiva cun animals manedels 

  • Tener aviert las surfatschas libras digl uaul cun tgirar quella regularmein.

Uauls da ruvers/uvrius (cuntinuadamein)

Project:

Il ruver ein aunc buca ina specia da plontas che dominescha ella cuntrada da Platta Pussenta. Ella s’auda tuttina claramein tier las specias caracteristicas indigenas, igl ei ina specia impurtonta sco spazi da viver per in grond diember da creatiras. Era vala il ruver sco albiert per il pli grond diember d’insects.

Ella costa exponida viers sid da Gonda e Plaun dil Luf, sin territori communal da Falera, dat gruppas da ruvers che valan da vegnir tgirai e promovi.

 

Dapi gl’onn 2012 va quei project, ed el cuntinueschails proxims onns. La Fundaziun PP vegn a tgirar vinavon las plontas giuvnas, ei vegn dau peisa da tener liber ils ruvers da plontas da concurrenza.

Lag digl Oberst
lag digl oberst8.jpeg

La cuntrada pitoresca ed idillica dil Lag digl Oberst ei sut protecziun naziunal. Igl ei stau in dils emprems objects da paliu che la Confederaziun ha renconuschiu a favur dils utschals ed amfibis. Il Lag digl Oberst e siu contuorn ei plinavon in impurtont territori da ruaus per la selvaschina. Ils onns sissonts segavan ins regularmein las surfatschas humidas. Oz fan gruppas da voluntaris quei, ensemen cun glieud dil survetsch civil en acziun pigl Uffeci cantunal per la protecziun digl ambient e natira (ANU). La Fundaziun PP sustegn tuts sforzs da mantener quei lag e siu contuorn.

 

Project da nughèrs
nussbäume1.jpeg

A Sagogn crescha e prosperescha il nughèr a moda excellenta. A Plaun Larisch ha la Fundaziun PP, ensemen cul Revier forestal Sagogn-Laax, plantau gl’onn 2014 20 plontas da qualitad. Ei setracta da sorts ch’ein resistentas encunter schelada e schitgira. Nughèrs portan fretg l’emprema gada pér suenter circa 10 onns.

bottom of page